Esango zenigukete nola sortu zen erakundea eta zein izan den bere ibilbidea urte hauetan zehar?
ASASAM irabazi-asmorik gabeko erakundea da, eta 1989an hasi zen Aiaraldean, desinstituzionalizazio psikiatrikoaren aurrean gaixotasun mentala duten pertsonei eta haien familiei arreta integrala eskaintzeko beharra ikusi zuten familien eskutik. Familiek ikusi zuten gaixotasun mentala zuten senideak ospitale psikiatrikoetatik ateratzen ari zirela pixkanaka, baina, hala ere, ez zegoen komunitate-arretarako inolako baliabiderik. Horregatik, lanari ekin zioten eta ASASAM bezalako erakundeak sortu zituzten. Pixkanaka, elkarteak gaur egun mantentzen den egitura sendoa hartu zuen. Sendotasun hori hainbat zerbitzu mantendu eta garatzeko erakunde publiko zein pribatuekin sinatuta ditugun lankidetza-hitzarmenetan gauzatzen da.
Gaur egun, zeintzuk dira garatzen ari zareten proiektuak?
ASASAMek hainbat zerbitzu eskaintzen dizkie gaixotasun mentala duten pertsonei eta behar duten familiei. Gure helburua da laguntza pertsonalizatuak ematea gaixotasun mentala duten pertsonei bizitzan zehar, autonomia pertsonala, bizi-kalitatea eta komunitatean benetako inklusioa lor dezaten, eskubide osoko herritartasuna ziurtatuz. Horregatik, hainbat zerbitzu eskaintzen ditugu, besteak beste:
Osasun mentaleko arazoak dituzten pertsonentzako zerbitzuak:
- Gizarte-ekintzako programa
- Zentro okupazionalaren programa
- Jarraipen soziolaboraleko programa
- Zentro psikosozialaren programa
- Esku-hartze Psikoedukatiboko Programa
- Orientazio eta laguntza psikologikoko programa
- Ostatu-programa
Bizimodu independentea babesteko programa:
- Aholkularitza juridikoko programa
- Familiei zuzendutako zerbitzuak:
- Gizarte-ekintzako programa
Orientazio eta laguntza psikologikoko programa:
- Familien eskola
- Aholkularitza juridikoko programa
- Gizarteari oro har zuzendutako programak:
- Boluntariotza Programa
- Ezagutu programa (hitzaldiak ikastetxe eta institutuetan)
- Sentsibilizazio-ekintzak (hitzaldiak, DMSM, 8M, 25N…)
Etorkizunari begira, zeintzuk dira epe laburra-ertainean (5 urte) identifikatzen dituzuen erronka nagusiak?
Urteetako hausnarketaren eta eskaintzen ditugun zerbitzuen etengabeko ebaluazioaren ondoren, ASASAMek Aiaraldean egiten dugun arreta hobetzeko funtsezkotzat jotzen ditugun bi erronka detektatu ditu. Erakundearen zerbitzu guztiak 18 eta 64 urte bitarteko pertsonei zuzenduta daudela kontuan hartuta, eta azken urteotan bizi izan dugun osasun-pandemiaren ondoren, argi dago programa espezifikoak garatu behar direla, bai osasun mentaleko arazoak dituzten adinekoentzat, bai adingabeentzat eta gazteentzat. Izan ere, 2024an osasun mentaleko arazoak dituzten gazteei laguntzeko garatu dugun programarako finantzaketa lortzea espero dugu.
Zer ekarpen egiten dizue Aisako kide izateak?
Batez ere segurtasuna ematen digu, ASASAM elkarte txikia baita. AISA sortzeko eman ziren lehen urratsetatik, ASASAMek ekimen hori babestu genuen, ez baitzegoen espazio propiorik Arabako Gizarte Esku-hartzearen eremuan, eta, gure ikuspegiaren arabera, guztiz beharrezkoa zen. Funtsezkoa iruditzen zaigu sektorea kolektibo gisa aitortzea eta AISAko kide izatea, administrazio publikoarekiko harremanak errazten baitizkigu. Azkenik, AISAko kide izateak informazioa eta segurtasuna ematen digu lan-harremanen erregulazioari dagokionez, elkarteko kide garen erakundeen arteko lan partekatuaren ikuspegitik.